Աստիճանաբար գրադարանների գիտելիքի պահոց գործառույթը վերափոխվում է հիշողության կամ ժամանցի վայրի գործառույթի: Որոշ գրադարանների հիմնական տարածքները ծառայում են առևտրի և փորձի փոխանակման համար: Ստեղծվում են սրճարաններ, կինոսրահներ, նվերների վաճառակետեր, հանգստի գոտիներ: Եթե նախկինում գրադարաններն ասոցացվում էին հանդարտ մի վայրի հետ, որտեղ ընդունված է խոսել շշուկով, ապա հիմա գրադարանային սրահները ակտիվ շփման տեղեր են: Այսինքն, գրադարանը գիտելիքի պահոցից անցում է կատարում դեպի բաց սոցիալական հարթակ:

«Գրադարակի» նպատակը և առաջնային խնդիրը մայրաքաղաքից հեռու և դժվար հասանելի գյուղական համայնքներում գրադարանների կառուցումն է` նպատակ ունենալով բարելավել կրթության ոլորտն այդ շրջաններում։ Առաջին հերթին «Գրադարակը» մասնակցում է դպրոցական գրադարանների հիմնանորոգման կամ դպրոցի որևէ սենյակի հիման վրա զրոյից գրադարան կառուցելու գործընթացին։ Հենց դպրոցներն են տալիս հնարավորություն իրականացնելու նախագծի երեք հիմնական գործառույթները. կառուցել, սարքավորել և ապահովել գրադարանը գրքերով։