Լրագրող և բլոգեր Զառա Ղազարյանն ընդգծում է՝ երեխայի հետ կապված ցանկացած հրապարակում նախ և առաջ պետք է դիտարկել երեխայի լավագույն շահի տեսանկյունից՝ հաշվի առնելով, որ համացանցում հրապարակված բովանդակությունը տարիներ շարունակ պահպանվում է և կարող է հետագայում դառնալ բուլինգի պատճառ։ Նրա խոսքով՝ չափահաս տարիքում երեխան կարող է չցանկանալ նույնականացվել իր մանկության որոշ հրապարակումների հետ, հատկապես եթե դրանք ներկայացրել են իրեն խոցելի կամ խիստ անձնական իրավիճակներում։ Հետևաբար, երեխաներին վերաբերող բովանդակություն հրապարակելիս անհրաժեշտ է ցուցաբերել առավել զգուշավոր մոտեցում՝ հնարավորության դեպքում խուսափելով նույնականացումից, փակելով դեմքերը կամ բացառելով այնպիսի կադրերի հրապարակումը, որոնք կարող են ապագայում բացասական ազդեցություն ունենալ երեխայի սոցիալական և հոգեբանական բարեկեցության վրա։