Քնի պակասը բերում է մի շարք ֆիզիոլոգիական փոփոխությունների:

Քնի պակասը բերում է մի շարք ֆիզիոլոգիական փոփոխությունների մարդու ուղեղում և մարմնում, որոնք կարող են խաթարել ինչպես կարճաժամկետ, այնպես էլ երկարաժամկետ առողջությունը։ Քնի պակասը հանգեցնում է մտավոր, կենտրոնացման, ուշադրության, հիշողության, ինֆորմացիայի ընկալման խաթարման, քանի որ թուլանում են նյարդային կապերը։
Քունը կարևոր դեր ունի նաև մկանների և բջիջների վերականգնման գործում, քանի որ քնի ընթացքում ակտիվանում է աճի հորմոնը։ Քնի պակասի դեպքում այս գործընթացները դանդաղում են, ինչը բերում է մկանային ցավերի ավելացման։
Հետազոտությունները ցույց են տվել` քնի երկարատև պակասը սերտ կապված է բարձր զարկերակային ճնշման, սրտամկանի ինֆարկտի, գլխուղեղի կաթվածի, գիրության, շաքարային դիաբետի, դեպրեսիայի, հիշողության վատացման, ցածր իմունային համակարգի, ֆիզիկական և մտավոր առողջության լաբիլության հետ։

Քնի պակասը ազդում է սթրեսի մակարդակի վրա:

Քնի ժամանակ օրգանիզմում իջնում են կորտիզոլի և այլ սթրես-հորմոնների քանակները։ Կորտիզոլի մակարդակը ցերեկը նվազում է, իսկ գիշերվա ընթացքում՝ ցածր մակարդակի վրա է։ Սակայն ոչ բավարար քնի դեպքում կորտիզոլի մակարդակը մնում է բարձր, ինչը հանգեցնում է նյարդային լարվածության։ Ոչ բավարար քունը հանգեցնում է նաև էմոցիոնալ անկայունության, իջնում է սթրեսային իրավիճակների հանդեպ զգայունության շեմը, անհատը դառնում է դյուրագրգիռ, չի կարողանում բավարար չափով վերահսկել իր հույզերը և առավել բուռն է արձագանքում դժվարություններին, որոնք, ի վերջո, երկարատև լինելու պարագայում, հանգեցնում են տագնապայնության, պանիկ գրոհերի, տրամադրության տատանումների, դեպրեսիայի և սուիցիդալ մտքերի։

Քնի պակասը ազդո՞ւմ է իմունային համակարգի վրա։

Քնի ընթացքում իմունային համակարգը արտադրում է հակամարմիններ և օտար մարմիններից, վիրուսներից և բակտերիաներից պաշտպանող հատուկ նյութեր։ Հետևաբար, քնի պակասի դեպքում, զգալիորեն իջնում է վերոնշյալ նյութերի քանակը օրգանիզմում՝ հանգեցնելով իմունային համակարգի ակտիվության նվազման և օրգանիզմի դիմադրողականության անկման։ Բացի այդ, եթե արդեն առկա է հիվանդություն, օրգանիզմի լավացման ու վերականգնման պրոցեսները զգալիորեն դանդաղում են։
Առողջ քունը ուղղակի ազդեցություն ունի մարսողական համակարգի և մարմնի զանգվածի վրա։ Այն ազդում է սովի և հագեցվածության զգացողությունները կարգավորող երկու կարևորագույն հորմոնների՝ լեպտինի և գրելինի վրա, որոնց` քնի խանգարման ժամանակ առաջացած դիսբալանսի դեպքում, դիտվում է ախորժակի բարձրացում և շատակերություն։
Քունը ազդում է մի շարք պրոցեսների վրա, որոնք ապահովում են սիրտ-անոթային համակարգի նորմալ գործունեությունը, արյան մեջ գլյուկոզայի, աճի և մի շարք այլ ներզատիչ հորմոնների նորմալ ցուցանիշները։ Համապատասխանաբար` քնի պակասը իր անմիջական հետևանքներն է թողնում այդ համակարգերի բնականոն աշխատանքի վրա ևս։

Ինչպես խուսափել քնի խանգարումներից

Քնի խանգարումներից խուսափելու համար չափազանց կարևոր է քնի հիգիենայի պահպանումը։ Դրանք որոշակի սովորություններ են, որոնց կանոնավոր կիրառումը կօգնի զգալիորեն բարելավել քունը: Օրինակ` ցանկալի չէ հեռուստացույց դիտել կամ հեռախոս օգտագործել քնելուց առնվազն մեկ ժամ առաջ։