Երևանի քաղաքապետարանի աշխատակազմի հասարակական կարգի պահպանության ծառայության առաջին կարգի մասնագետ Սամվել Հակոբյանն ընդունում է, որ Աբովյան փողոց 31 հասցեում գտնվող խանութներն աղճատում են շենքի արտաքին տեսքը, և պետք է անհապաղ դրվի խնդրի լուծման հարցը։ Խանութների գործունեությունը պետք է համապատասխանեցված լինի մշակութային պահպանության պահանջներին, և եթե շենքը կորցնում է իր պատմամշակույթային տեսքը, ապա նախատեսվում են անհրաժեշտ միջոցներ՝ վերացնելու կամ շտկելու խախտումները։

Նրա խոսքով՝ պատմամշակութային շենքերի օգտագործման թույլտվություն ստանալու համար սեփականատերը կամ շահառուն պետք է դիմի Երևանի քաղաքապետարան, ներկայացնելով անհրաժեշտ փաստաթղթերի փաթեթ, որն ընդգրկում է շենքի սեփականության իրավունքը հաստատող փաստաթղթերը, առաջարկությունները և այլն:

Նա նաև հավելեց, որ օգտագործման ընթացքում շենքերի նկատմամբ շարունակաբար իրականացվում է հսկողություն՝ ապահովելու համար դրանց պատշաճ պահպանումը։

«Մոսկվա» կինոթատրոնի մարկետինգի բաժնի փոխտնօրեն Անահիտ Խաչատրյանը տեղեկացրեց, որ «Մոսկվա» կինոթատրոնի ամառային դահլիճը ժամանակավորապես դուրս է շահագործումից, և ներկայում որևէ ֆիլմային կամ մշակութային միջոցառում չի իրականացվում այնտեղ։

Ինչ վերաբերում է դահլիճի ապագա ծրագրերին՝ որոշակի քննարկումներ ընթացքի մեջ են, սակայն կոնկրետ ծրագրեր, ժամկետներ կամ նախաձեռնություններ հաստատված չեն, ուստի դահլիճի հետագա օգտագործման կամ վերականգնման վերաբերյալ հստակ տեղեկատվություն այս պահին չկա։

Կենտրոն վարչական շրջանի ղեկավար Պետրոս Պետոյանի խոսքով, Երևանի և ամբողջ Հայաստանի պատմամշակութային շենքերի հիմնական խնդիրը այն է, որ դրանք նախկինում սեփականաշնորհվել են, և այսօր շատ սեփականատերեր անտարբեր են վերաբերվում այդ շենքերի պահպանությանը։
Ներկայում նմանատիպ շենքերը գույքագրվում են, և յուրաքանչյուրի վերաբերյալ համապատասխան որոշում է կայացվում։

«ԱՕԿՍ-ի շենքը գտնվում է վստահելի ձեռքերում։ Շուտով շենքին կտրվի երկրորդ կյանք, և դրա տարածքում կստեղծվի մշակութային կենտրոնի մի հատված»․ Պետրոս Պետոյան