Ղեկավար՝ Տիգրանուհի Ներսեսյան
Սակայն իր նշանակալի դերը Էջմիածինը ստացավ 301 թ., երբ հայ ժողովուրդը ընդունեց քրիստոնեությունը որպես պետական կրոն։ Հենց այդ ժամանակ այստեղ հիմնադրվեց Մայր Տաճարը, որը աշխարհի ամենահին քրիստոնեական տաճարներից է: Այստեղ է գտնվում Ամենայն Հայոց Կաթողիկոսի նստավայրը: Սուրբ Էջմիածնի Մայր Տաճարը կառուցվել է մոտավորապես 303 թվականին։ Ըստ լեգենդի՝ Սուրբ Գրիգոր Լուսավորիչը մարգարեական տեսիլք է ունեցել, ըստ որի՝ Աստծու Միածին Որդին իջնել է երկնքից և ոսկե մուրճով հարվածել գետնին՝ ցույց տալով այն վայրը, ուր պետք է կառուցվեր Էջմիածնի Սուրբ Տաճարը: «Էջմիածին» նշանակում է «իջավ Միածինը»՝ հիշեցնելով այդ տեսիլքը։ Էջմիածնի Մայր Տաճարը համարվում է աշխարհում առաջին պաշտոնապես կառուցված քրիստոնեական տաճարներից մեկը։
Մայր Աթոռի թանգարանը հայ եկեղեցական և մշակութային ժառանգության նշանակալի կենտրոններից է։ Թանգարանում ներկայացված են արժեքավոր ձեռագրեր, եկեղեցական արծաթե իրեր, խաչեր, պատմական արձանագրություններ, պատկերագրական նյութեր, ինչպես նաև սրբություններ, մասունքներ, որոնցից շատերն ունեն համաշխարհային նշանակություն։ Թանգարանի բացառիկ ցուցանմուշներից է Սուրբ Գեղարդը։
Սուրբ Գեղարդը ոչ միայն քրիստոնեական սրբություն է, այլև հրաշագործ զորություն ունի։ Այն օգտագործվել է տարբեր ժամանակներում՝ աղետներից, հիվանդություններից և պատերազմներից ժողովրդին ազատելու համար։ Օրինակ՝ 18-րդ դարի վերջին վրացի երկու թագավորները դիմել են Սիմեոն Երևանցի և Ղուկաս Կարնեցի կաթողիկոսներին՝ խնդրելով Գեղարդը տանել Թիֆլիս՝ ժանտախտի համաճարակը մեղմելու համար։ Գրավոր վկայությունների համաձայն՝ Սուրբ Գեղարդի զորությամբ այդ հիվանդությունը վերացել է։
Ազգագրական բաժնում են գտնվում Հայաստանի մի շարք շրջաններից, Արցախից և Արևմտյան Հայաստանից բերված ցուցանմուշներ՝ գորգեր, կարպետներ, խոհանոցային սպասք, կենցաղային իրեր, տեղական արհեստներին վերաբերող նյութեր, հնատիպ գրքեր, լուսանկարներ, կահույք և դրամագիտական հավաքածու։
Էջմիածնի պատմաազգագրական թանգարանը մի հատված է նվիրել 19-րդ դարի վերջի և 20-րդ դարի սկզբի Էջմիածնի քաղաքային բնակարանի ինտերիերին։ Սրահը թանգարանի ամենահետաքրքիր բաժիններից է, քանի որ այն ներկայացնում է այդ ժամանակաշրջանի քաղաքի բնակիչների կենցաղը, ապրելակերպը և ինտերիերը։
Բնակարանի մոդելը ցույց է տալիս միջին խավի էջմիածնեցի ընտանիքի ավանդական բնակարանի ներքին տեսքը՝ ներառյալ կահույքը, հարդարանքը, գորգերը, կենցաղային իրերը։ Այստեղ կարելի է տեսնել նաև ժամանակին բնորոշ ճաշասենյակ, ննջասենյակ և հյուրասենյակ։
Թանգարանը գտնվում է Էջմիածին քաղաքի կենտրոնում՝ Մաշտոցի փողոցում։ Այցելուները կարող են ծանոթանալ թանգարանի ցուցանմուշներին՝ երկուշաբթիից ուրբաթ՝ 10:00-ից 17:00-ն ընկած ժամանակահատվածում։ Կիրակի օրերին թանգարանը փակ է։
Մաչանենց տան գինիների շշերի վրա տեղադրված է QR կոդ, որի սկանավորման դեպքում Մաչանենց տան հիմնադիր Գրիգոր Մաչանենց Բաբախանյանը կենաց է ասում։
Էջմիածինը Երևանից ընդամենը 20 կմ հեռավորության վրա է, և հասանելի է մի քանի հարմար տարբերակով։
1․ Միկրոավտոբուսով
Եթե դուք գտնվում եք քաղաքի կենտրոնում՝ Երիտասարդական մետրոյի կամ Մատենադարանի տարածքում, ապա կարող եք ուղղակիորեն նստել միկրոավտոբուս, որը երթևեկում է Էջմիածին։ Տրանսպորտի արժեքը կազմում է ընդամենը 300 դրամ, իսկ երթուղիները սկսում են աշխատել վաղ առավոտից՝ մոտավորապես 07:00-ից։ Ուղևորությունը տևում է 30-40 րոպե՝ կախված խցանումներից։
2․ Տաքսի ծառայություններ
Սարյան փողոցից գործում են նաև համատեղ ուղևորություն ապահովող տաքսիներ։ Դրանք աշխատում են գրեթե միկրոավտոբուսի տրամաբանությամբ՝ սպասում են, մինչև ավտոմեքենան լցվի ուղևորներով, ապա շարժվում են Էջմիածին։ Գինը 500 դրամ է։
3․ Գնացք
Եթե ուզում եք ձեր ճամփորդությանը մի փոքր ռոմանտիկա ավելացնել, ապա կարող եք ընտրել Երևան-Գյումրի երթուղու գնացքը, որն ունի կանգառ նաև Էջմիածնի գյուղերից մեկում։ Ժամանակացույցն ու գները հարկավոր է ստուգել նախապես։
Էջմիածինը հայ ժողովրդի հոգևոր կենտրոնն է, միաժամանակ այն ապրող քաղաք է, և ճամփորդական լրագրության ձևաչափը հնարավորություն է տալիս ներկայացնել Էջմիածնի հոգևոր, պատմական, մշակութային դեմքը, ինչպես նաև ներառել քաղաքային կյանքը, տրամադրել ավելի կիրառելի տեղեկատվություն։