Բարձրագույն կրթության ոլորտում ներառականության ապահովումը Հայաստանում մնում է հրատապ և համակարգային մոտեցում պահանջող խնդիր։ Չնայած ռազմավարական փաստաթղթերում ներառականության անհրաժեշտությունը շեշտադրվում է, հստակ քայլերի, ժամանակացույցերի և իրականացման մեխանիզմների բացակայությունը խոչընդոտում է դրական տեղաշարժերը։ Ներառական միջավայր ստեղծելու համար անհրաժեշտ է ոչ միայն քաղաքական կամք, այլև համակարգային բարեփոխումներ՝ սկսած նախադպրոցական կրթությունից մինչև բարձրագույն կրթություն։ Հաշմանդամություն ունեցող անձանց կրթության իրավունքի լիարժեք իրացումը հնարավոր կլինի միայն այն դեպքում, երբ յուրաքանչյուր կրթական հաստատություն ունենա հստակ մշակված ներառական քաղաքականություն և համապատասխանող գործնական միջոցառումներ: